രാഷ്ട്രീയ പാര്‍ട്ടികളെ മൂക്കുകൊണ്ട് ക്ഷ എഴുതിച്ച് രാജ്യത്തെ തെരഞ്ഞെടുപ്പു ചരിത്രത്തില്‍ വേറിട്ട സ്ഥനം നേടിയ ടി എന്‍ ശേഷന് പ്രായം ഒറ്റയടിക്ക് കൂടിയോ. സംശയം ഉയര്‍ത്തുന്നത് ഒരു പത്രപ്പരസ്യമാണ്. ടി എന്‍ ശേഷന് ഒരു വര്‍ഷം നീളുന്ന ജന്മശതാബ്ദി ആഘോഷം സംഘടിപ്പിക്കാനാണ് പാലക്കാട്ടെ ഒരു ട്രസ്റ്റ് മുന്നിട്ടിറങ്ങിയിരിക്കുന്നത്. ഡോ പത്മ വെങ്കിട്ടരാമന്റെ നേതൃത്വത്തില്‍ ശതാബ്ദി ആഘോഷക്കമ്മറ്റിയും രൂപീകരിച്ചു. ആഘോഷങ്ങള്‍ക്ക് ഇന്ന് തുടക്കമെന്ന് അറിയിക്കുന്നതാണു പരസ്യം.
1996 വരെ മുഖ്യ തിരഞ്ഞെടുപ്പു കമ്മീഷണറും അതിനു ശേഷം രാഷ്ട്രപതി സ്ഥാനാര്‍ത്ഥിയുമൊക്കെയായി കളം നിറഞ്ഞു കളിച്ച ശേഷന് ഇത്രപെട്ടെന്ന് 100 വയസ്സെത്തിയോ? ഇന്റര്‍നെറ്റില്‍ ലഭ്യമായ വിവരങ്ങള്‍ ശരിയെങ്കില്‍ ടി എന്‍ ശേഷന് 2011 ഡിസംബര്‍ 15 ന് 79 വയസ്സ് പൂര്‍ത്തിയാകും, എണ്‍പതാം വയസ്സിലേക്കു കടക്കുകയും ചെയ്യും.www.myastrologyhoroscope.com എന്ന വെബ് സൈറ്റില്‍ ശേഷന്റെ ജാതകം ലഭ്യമാണ്. അതുപ്രകാരം 1932 ഡിസംബര്‍ 15 ന് രാവിലെ കൃത്യം 8 മണിക്കാണ് അദ്ദേഹത്തിന്റെ ജനനം.തുടര്‍ന്നുള്ള അദ്ദേഹത്തിന്റെ ജീവചരിത്രം പരിശോധിച്ചാലും ജനന തീയതിയില്‍ സംശയിക്കേണ്ട സാഹചര്യമില്ല.
1953 ല്‍സിവില്‍ സര്‍വീസില്‍ ഐ പി എസ് കിട്ടിയ ശേഷന് അത് വേണ്ടെന്നുവച്ച് 1954 ല്‍ വീണ്ടുമെഴുതി ഐഎഎസ് കരസ്ഥമാക്കി. തൊട്ടടുത്തവര്‍ഷത്തെ കേഡറില്‍ ഐഎഎസില്‍ പ്രവേശിക്കുകയും ചെയ്തു. 1989 ല്‍ വി പി സിംഗ് പ്രധാനമന്ത്രിയായപ്പോള്‍ അദ്ദേഹത്തിനൊപ്പം ക്യാബിനറ്റ് സെക്രട്ടറിയായി.1990 ഡിസംബര്‍ 12 മുതല്‍ 1996 ഡിസംബര്‍ 11 വരെ ആറു വര്‍ഷം മുഖ്യതിരഞ്ഞെടുപ്പു കമ്മീഷണറുമായി.
അങ്ങനെ 15 വര്‍ഷം മുമ്പ് മുഖ്യതിരഞ്ഞെടുപ്പു കമ്മീഷണറായി വിരമിച്ചയാള്‍ക്ക് പെട്ടെന്ന് നൂറുതികഞ്ഞെന്നു കണ്ടപ്പോഴുള്ള അത്ഭുതമാണ് അന്വേഷണത്തിന് കാരണമായത്. യഥാര്‍ത്ഥത്തില്‍ ശേഷന് തികയുന്നത് 80 വയസ്സാണ് . പിന്നെങ്ങനെ ജന്മശതാബ്ദി ആഘോഷിക്കും. ഇനി ശതാഭിഷേകമാണെങ്കില്‍പ്പോലും 84 വയസ്സില്‍ ആയിരം പൂര്‍ണചന്ദ്രന്മാരെ കാണുമ്പോഴാണ്.
പിന്നെ എന്തിന് 20 വര്‍ഷം മുമ്പേ ജന്മശതാബ്ദി ആഘോഷിക്കണം എന്നതാണു പ്രസക്തമായ ചോദ്യം. ശതാബ്ദി സംബന്ധിച്ച അജ്ഞതയാകാം ഒരുകാരണം. അല്ലെങ്കില്‍ എല്ലാം ആഘോഷിക്കാനും പണം പിരിക്കാനുമുള്ള വ്യഗ്രത. എന്തായിലും ടി എന്‍ ശേഷനെപ്പോലെ സമൂഹം ആദരിക്കുന്ന വ്യക്തിയെ ഇങ്ങനെ പരിഹാസപാത്രമാക്കിയത് ചര്‍ച്ചയായി മാറുകയാണ്.
അഭിപ്രായങ്ങളൊന്നുമില്ല:
ഒരു അഭിപ്രായം പോസ്റ്റ് ചെയ്യൂ